شاگردن تي سمارٽ فون جا اثر

سائنس ۽ ٽيڪنالاجيءَ جي ترقيءَ جي ڪري مختلف وقتن تي اسان تائين تمام ڪارائتيون ايجادون پُهچنديون رهيون آهن. اُنهن ايجادن جي استعمال اسانجي زندگيءَ کي يقيناً سهنجو ڪيو آهي. اُنهن ئي ايجادن مان هڪ ايجاد موبائيل فون به آهي. جيڪا سڀ کان پهرين ”موٽرولا“ ڪمپنيءَ 1973 ۾ متعارف ڪرائي. ’جون مِچل‘ ۽ ’مارٽن ڪُوپر‘ انهيءَ فون کي متعارف ڪرائيندڙ پهريان ماڻهو هئا. ان فون جو وزن لڳ ڀڳ ٻه ڪلو گرام هو. جنهن کي ايڏو آسانيءَ سان پاڻ سان گڏ کڻي هلڻ ممڪن نه هو. دنيا جي پهرين موبائيل فون ڪال، 3 اپريل 1973ع تي مارٽن ڪُوپر، ڊاڪٽر جوئيل. ايس. انگيل کي ڪئي. موبائيل فون دنيا جي ماڻهن کي ايترو ويجهو ڪري ڇڏيو آهي، جو هاڻي موبائيل فون کانسواءِ زندگي گذارڻ جو ته تصور به نٿو ڪري سگهجي. موبائيل فون هاڻي اڄ جي بنيادي ضرورتن مان هڪ بڻجي چُڪي آهي. هاڻي ته سمارٽ فون اچي چڪا آهن، جن ذريعي اسان انٽرنيٽ استعمال ڪري سموري دنيا سان جُڙيل رهي سگهون ٿا ۽ رهُون ٿا. اڄ اسان سمارٽ فون جي مختلف اثرن جو ذڪر ڪنداسين، جيڪي اڄ جي شاگردن جي زندگين تي مرتب ٿي رهيا آهن. تازيءَ تحقيق موجب دنيا جا 95 سيڪڙو شاگرد موبائيل فون استعمال ڪن ٿا، جن مان 75 سيڪڙو شاگردن وٽ موبائيل فون انٽرنيٽ سان جڙيل آهي. مطلب ته اُهي سمارٽ فون استعمال ڪن ٿا. اسان ٿورو پوئتي نگاهه وجهنداسون ته اُهي ڏينهن به هئا، جڏهن موبائيل فون تعليمي ادارن ۾ کڻي اچڻ ۽ استعمال ڪرڻ جي سخت منع ٿيل هئي. ڇو ته اُن وقت اِهو ئي سمجهيو ويندو هو، ته هي ٻارن جي استعمال جي شئي ناهي. هن کي بالغ عمر جا ماڻهو ئي استعمال ڪري سگهن ٿا. ڇو ته ان جا ٻارن ۽ شاگردن تي ناڪاري اثر پون ٿا. ان پسمنظر ۾ وري اڄ جي دؤر تي نظر ٿا وجهون ته قصو ئي ابتو پيو نظر اچي. اڄ ته سمارٽ فون استعمال ڪرڻ، وقت جي اهم ضرورت بڻجي پئي آهي ۽ شاگردن جي تعليمي ضرورتن لاءِ به لازمي ٿي پئي آهي