جهوپڙيءَ کان روشن مستقبل تائين علم، عزم ۽ گڏيل خواب جو سفر
اقبال جوڻيجو
تعليم رڳو ڪتابن ۾ لکيل لفظن کي پڙهڻ يا امتحانن ۾ ڪاميابي حاصل ڪرڻ جو نالو ناهي، پر اها انسان جي سوچ، شعور، ڪردار ۽ مستقبل کي سنوارڻ جو سڀ کان اثرائتو ذريعو آهي. ڪنهن به سماج جي حقيقي ترقيءَ جو اندازو ان جي عمارتن جي اوچائيءَ مان نه، پر ان جي تعليمي ادارن مان اڀرندڙ روشن ذهنن ۽ باشعور نسلن مان لڳائي سگهجي ٿو.مون لاءِ گورنمينٽ هائر سيڪنڊري اسڪول حاجي جوڻيجو رڳو هڪ تعليمي ادارو نه، پر هڪ خواب، هڪ ذميواري ۽ هڪ اهڙو سفر آهي، جنهن جي شروعات ڪکن ۽ ڪانن سان ٺهيل هڪ ننڍڙي جهوپڙيءَ مان ٿي ۽ جيڪو اڄ هزارين شاگردن ۽ شاگردياڻين جي روشن مستقبل سان وابسته آهي. هن اداري جي تاريخ اسان کي اهو سبق ڏئي ٿي ته جيڪڏهن نيت نيڪ، ارادا مضبوط ۽ مقصد اعليٰ هجن، ته محدود وسيلا به وڏين ڪاميابين جي راهه روڪي نٿا سگهن.هن اسڪول جي ترقيءَ پٺيان باني استادن جي محنت، موجوده استادن جي لگن، شاگردن جي جاکوڙ، والدين جي اعتماد ۽ علم دوست ماڻهن جي سهڪار جو وڏو حصو آهي. مان انهن سڀني شخصيتن ۽ ساٿين کي دل جي گهراين سان خراجِ تحسين پيش ڪريان ٿو، جن هن اداري جي واڌ ويجهه لاءِ پنهنجو وقت، صلاحيتون ۽ وسيلا وقف ڪيا. خاص طور تي استادن جي محنت ۽ قربانين کي ساراهڻ ضروري آهي، ڇاڪاڻ ته ڪنهن به اسڪول جي اصل طاقت ان جي عمارت نه، پر ان جا استاد ۽ انهن جي تربيت هيٺ پلجندڙ شاگرد هوندا آهن
منهنجي نظر ۾ اسڪول جي سنڀال ۽ ترقي رڳو انتظامي ذميواري ناهي، پر هڪ اخلاقي ۽ سماجي فرض پڻ آهي. انهيءَ ڪري، پنهنجي مصروفيتن باوجود اسڪول سان مسلسل رابطي ۾ رهڻ، استادن ۽ شاگردن سان ملاقاتون ڪرڻ ۽ والدين سان ڳالهه ٻولهه ذريعي سندن راين ۽ ضرورتن کي سمجهڻ کي مان پنهنجي ذميواريءَ جو اهم حصو سمجهان ٿو. منهنجو يقين آهي ته بهترين تعليمي ماحول تڏهن ئي پيدا ٿيندو، جڏهن انتظاميا، استاد، والدين ۽ شاگرد هڪ گڏيل مقصد لاءِ هڪ ٻئي سان سهڪار ڪندا. اسان جي ڪوشش آهي ته هي ادارو جديد تعليمي گهرجن سان هم آهنگ ٿئي، جتي روايتي علمي قدرن سان گڏ سائنسي سوچ، تحقيق، تخليقي صلاحيتن، ٽيڪنالاجيءَ جي ڄاڻ، اخلاقي تربيت ۽ تنقيدي شعور کي به هٿي ملي. اسان چاهيون ٿا ته هتان تعليم حاصل ڪندڙ ٻار رڳو پنهنجي لاءِ نه، پر پنهنجي خاندان، سماج، سنڌ ۽ ملڪ لاءِ به مثبت ڪردار ادا ڪندڙ شهري بڻجن. انهيءَ مقصد ڏانهن هڪ اهم قدم اسڪول جي هن ڊجيٽل ۽ آنلائين ميگزين جي صورت ۾ اسان جي سامهون آهي. هي ميگزين رڳو سرگرمين ۽ ڪاميابين جو رڪارڊ نه هوندو، پر شاگردن جي لکڻين، تخليقي صلاحيتن، خيالن ۽ خوابن جي اظهار جو هڪ کليل پليٽ فارم پڻ بڻجندو. مون کي اميد آهي ته هيءُ ذريعو استادن جي علمي ڪاوشن کي اجاگر ڪرڻ، والدين سان رابطي کي مضبوط ڪرڻ ۽ اسڪول جي مثبت سڃاڻپ کي دنيا تائين پهچائڻ ۾ اهم ڪردار ادا ڪندو
اسان جو خواب هن موجوده ڪاميابيءَ تي ختم نٿو ٿئي. اسان چاهيون ٿا ته اڄ هن اداري ۾ پڙهندڙ ٻار سڀاڻي جا ڊاڪٽر، انجنيئر، استاد، محقق، ليکڪ ۽ ذميوار اڳواڻ بڻجن. اسان جو خواب آهي ته علم جي اها شمع، جيڪا هڪ ننڍڙي جهوپڙيءَ ۾ روشن ٿي هئي، سا اڃا وڌيڪ روشني پکيڙي ۽ هڪ ڏينهن هي ادارو اعليٰ تعليم ۽ تحقيق جي هڪ وڏي مرڪز جي صورت اختيار ڪري. جهوپڙي ننڍڙي هئي، پر خواب تمام وڏو هو، ۽ اهو خواب اڄ به سفر ۾ آهي. اچو ته گڏجي ان خواب کي حقيقت بڻائڻ لاءِ پنهنجو ڪردار ادا ڪريون، ڇاڪاڻ ته تعليم تي ڪيل سيڙپڪاري دراصل ايندڙ نسلن جي مستقبل تي ڪيل سيڙپڪاري آهي
اقبال جوڻيجو
سنڀاليندڙ
گورنمينٽ هائر سيڪنڊري اسڪول حاجي جوڻيجو
شاندار سوچ، اعليٰ خواب ۽ بهترين لفظ! واقعي تعليم ئي قومن جي ترقيءَ جو راز آهي. اسڪول جي هن ڊجيٽل ميگزين لاءِ واڌايون، هي شاگردن لاءِ هڪ بهترين پليٽ فارم ثابت ٿيندو. سلام آهي انهن سڀني استادن کي جيڪي علم جي شمع روشن ڪري رهيا آهن
تعليم لاء پاڻ پتوريندڙ ۽ ھن اداري جي سار سنڀال لاء ھر وقت جدوجھد ڪندڙ ادا اقبال جوڻيجو جس لھي
اقبال جوڻيجو جي محنت، همت ۽ تعليم سان محبت کي سلام، جنهن هڪ ننڍڙي جهوپڙيءَ مان اسڪول جي شروعات ڪئي، اڄ اهو ادارو هڪ شاندار عمارت سان گڏ هائير سيڪنڊري اسڪول بڻجي چڪو آهي. هن اداري ۾ اڄ به غريب پورهيتن جا ٻار تعليم حاصل ڪري پنهنجي روشن مستقبل جا خواب ڏسي رهيا آهن. بيشڪ، اقبال جوڻيجو جهڙا ماڻهو سماج جو فخر آهن، جيڪي علم جي روشنيءَ سان ڪيترين ئي زندگين کي روشن ڪن ٿا.
الله پاڪ اقبال جوڻيجو کي صحت، سلامتي ۽ وڏي ڄمار عطا فرمائي، سندس هن نيڪ ڪم کي صدقو جاريه بڻائي ۽ کيس دنيا ۽ آخرت ۾ اجر عظيم عطا فرمائي. آمين يا رب العالمين.
اسان سائين اقبال جوڻيجو جي محنت، لگن ۽ تعليم جي بهتريءَ لاءِ ڪيل قيمتي ڪوششن کي دل جي گهراين سان ساراهيون ٿا.
اسڪول جي ترقي، شاگردن جي بهتر تعليم ۽ سکيا لاءِ سازگار ماحول پيدا ڪرڻ ۾ سندن ڪردار ۽ ذميواريءَ جو احساس انتهائي قابلِ تعريف آهي. سندن محنت، خلوص ۽ تعليم سان وابستگي ٻين لاءِ پڻ هڪ بهترين مثال آهي.
اسان دعاگو آهيون ته الله پاڪ سائين اقبال جوڻيجو کي وڌيڪ ڪاميابيون عطا فرمائي ۽ کين تعليم جي ميدان ۾ وڌيڪ بهتر خدمتون سرانجام ڏيڻ جي توفيق ڏئي.
سائين اقبال جوڻيجو، اوهان جي محنت ۽ تعليمي خدمتن کي سلام! 🌹